Sabato 15 febbraio il nostro amico Mario Ponti ci ha lasciati
Lo vogliamo ricordare con una delle sue bellissime poesie
AL LUTT DAL CAMPANIN
Pasa fughent sul campanin 'na sbira.
La và, la và`fin caa ga paar a see...
e poo la frena e poo bel bell la gira,
la vola pusee fort, la turna indree.
La riva in primavera da 'na spunda
da là di vall, di munt, da là da maar,
la gira in da 'sti post e la sa punda
sul campanin che poo a lee 'l ghe caar.
Chi la sua noova vita la incumeenza;
cume 'na pasqua lee la viif cunteenta..
La sbiga via dal teec cun viulenza,
la sfiura tutt cui 'i al e la ralenta.
Da cursa poo la pasa su la scima
dal campanin; intuurnu a luu la vola;
la va da noof, la va 'n da l'eva prima,
la tuurna..., la cipiss e la gicoola.
L'è 'l pusee bel saluut che lee l'è boona
da fac al campanin vec e smacaa
e ai so tre campan che quenta i sona
i la saluda e i resta ricambiaa.
Parò su là ghè 'un voot; mo 'na campana
a la ghè più! La guera 'al laa vuluuda
e piü sa seent la sua vuus luntana...
Poo e la sbira la see'n' incurgiuda!
La voola sempru là e, disperada,
la vurarìss guarì quela ferida
perchè par quela lee mö l'è malaada!
OH poora sbira, chi ca l'aa capìda ???
Al paar ca meenca a lee quaicoss da gross;
la cerca chì, la vaarda là, la ruuga
e la seent quasi rumpass i sò oss;
ga paar da deventaa 'na tartaruuga!!
Al campanin l'è senza 'na campana
e senza quela l'è deventaa brutt;
ii laa purtaada via e l'è luntana!!
Inteent a luu ga tooca purtà 'al lutt!!!
L'è mie luu dumà ca 'l pena e teent
e mia dumà luu l'è in cundizionn;
iscì l'è dal paiiss tuuta la geent
ca la piessc mia, ma ca la gaa 'l magoon!!
Le gaa 'l magoon; la seent una tristézza
na giò 'n dal coor par quela sua campana;
la vurarìss pruvà la cuntentèzza
da rivedela su' n da la sua tana.
E se capìss questa sua nustalgia:
quela campana l'eeva par lee tutt.
Da lee la degusta la meludiia
e par lee mo ga tooca purtà 'l lutt.
L'eeva par lee la sveglia matutina,
da la giurnaada l'eva le cumpagna
cunt la sua vuuss ca la rivava fina
in tucc i poost luntee da la campagna.
E dal mesdì l'eva par lee l'aviis;
l'Ave Maria la sunaava mesta
e col sò soon la risciarava i viiss;
la ribateva alegra al dì da festa .....
In fin di cuunt a leeva la sua vuuss
a la: matina quasi cum'el gall;
la faava i auguri a tuucc i spuuss
e la rivava fin giò 'n da la vall.
La géént lee le ciamava per la Meesa,
e la sunava cun duluu par i moort
e la sunava par al foocc in presa
e par difent cui armi la sua soort!
Mò la ghè più. La sbira al laa ciamada
luntee 'n dal muunt, chissà 'n da che cuntrada!!
QUEL MARIO - 1944
(al secolo Mario Ponti)
Poesia scritta da Mario Ponti a Firenze nel Giugno 1944